MAKTABGACHA TA’LIM TASHKILOTLARIDA BOLALARGA O‘ZBEK VA INGLIZ TILLARINI INTEGRATIV ALOQADORLIKDA O‘RGATISH TAMOYILLARI

Annotasiya

Ma’lumki, til muayyan jamiyatda o‘zaro shartlashilgan ma’nolarni ifodalashga xizmat qiluvchi belgilar tizimi bo‘lib, ular til sathlarida amal qiluvchi qonun-qoidalar asosida nutq sifatida voqelanadi. Nutq til mahsuli sifatida insonlarning o‘zaro muloqot yuritishini ta’minlaydi va axborotni qabul qilish va uzatish funksiyalarini bajaradi. B.N.Golovin til - bu “imkoniyatli til vositasi” bo‘lsa, nutq esa “harakatdagi aynan o‘sha vositalar”dir deya ta’kidlaydi. Shu bois til lingvistik hodisa hisoblansa-da, ta’limiy vosita sifatida psixologik jarayonlarni ham o‘z ichiga oladi. Umuman ta’lim - tarbiya jarayoni ta’limning umumdidaktik tamoyillaridan kelib chiquvchi didaktik, psixologik, lingvistik, metodik va boshqa qonuniyatlarga amal qiladi. Tamoyil (prinsip) termini “asos bo‘ladigan yo‘l - yo‘riq, qonun - qoida” ma’nosini ifodalaydi. Ye.I.Passov ta’biricha, “tamoyil - o‘qitish jarayoni atalmish binoning poydevoridir”.